Column Peter Bouten | vleegemepper

Vandaag ving ich miene dreij neet…ich mót ut effe kwiët. De meiste die mich kennen, weite det ich gen sjportief type bun…op wanjele en vésse nao. Dao is echter éin sport die ich anoniem al sinds jaor en daag beoefen. Dees sjport velt ónger de kattegorie ‘rekketsjporten’, zoëas betminton, skwasj, padel, pingpongen en tennis. Naodael van dees rekketsjporten is, det utgeen was se weg hubs gehouwd auch dök weer truuk kumt…samengevat: un vriej nutteloze bezigheid.

De rekketsport wao ich ut euver hub (en waobiej ich auch de bekhend, 4hend en smesj hanteer..(unne dropsjot is minder effectief gebleken), wuurd ‘vleegemeppen’ geneumd.

Ich betaal gen contributie…hub gen jaorvergaderingen of bardeenst, hoof neet nao de decathlon veur vleegemepkleier en hiel belangriëk: de sjpelregels zien euverzichtelijk. Ut rekket krieg se veur 50 eurocent biej de action, hoewel ich zelf de veurkeur gaef aan die van temu..3 veur 50 eurocent, ligge baeter in de handj en mepoppervlaktedoorsnee is grótter. Sinds gister is hiej echter un wriëd einde aan gekomme!

Miene augappel achtte ut noëdzakelijk, vanwaege de strontj op de ramen ( van un vléég he..zou un vleeg 60 cm groët zien en 34 kilo waege..alla den..) un hordeur aan te sjaffe!!! Los van ut feit det ich noe biej de praktijkondersteunster van de hoësarts  op de vraog ‘doot ge auch get aan sporten?’ ‘nae’ mót verkaupe, zaet mien vrouw op dees meneer auch get euver mien prestaties t.a.v. ut vleegemeppen.

Jao hallau..ich ken neet altiëd winnen, ich houw auch waal us mis..net wie Tom Okker en Bettine Vriesekoop! Ich weit effe neet wiej ich ut sjportieve gaat mót vullen..mer “dínke” is gelökkig auch un sjport. Mich wachten un paar horrordaag! Miene vleegemepper sjteit veur un prikske (paar verklaorbare gebroëkssjpaore) op marktplaats.