Column Peter Bouten | Hae kumt hae kumt
Ut ‘heerlijk avondje’ sjteit weer veur de deur.
Zoëas al jaore mien gewuuënte is, neem ich thoës de rol van de Sint op mich en den zoëdanig verkleid det elke twiëfel biej mien kleinkinjer euver ‘besjeit Sinterklaos noe wáál of néét?’ biej deze veur altiëd weggenaome is!
Dit jaor hub ich genne Piet biej mich, want om gedeuns in ut kader van ‘geliëke rechten en/of discriminatie’ in combinatie met ‘ós tradities’ te veurkómme (wat ich persuënlijk allemaol nogal pietlutterig gezeik ving) had ich unne Zjwarte Piet unne Roetvaegpiet unne Kleurenpiet unne genderneutrale Piet unne Raegenbaogpiet unne vrouwelijke Piet unne Zielepiet unne doëie Piet unne homo- of bisexuele Piet unne Vegapiet unne Zeurpiet unne groët- én unne kleingesjaope Piet unne Rolsjtoolpiet unne carnivore Piet unne Kanariepiet unne transseksuele Piet un Therapietje un Pietje Preciës un Dwergpietje unne Hoëge Piet unne links- én unne rechtsdragende Piet, unne Dieke en unne Dunne Piet én Óme Piet mei mótte neme..los van unne nogal groëte groep miense die toevallig néét ‘Piet’ heite en zich daórom áuch gepasseerd zouwe kenne veule. Die had ich den auch nog allemaol un tas koffie un sjtök vlaai en un fles beer mótte gaeve.. jao sorry..ich bun Sinterkláos neet!
En de kinjer..die hadde der den veur Piet Sjnót biej gezaete!
